નયનને બંધ રાખીને

નયનને બંધ રાખીને 

અશ્રુ વિરહની રાત ના ખાળી શક્યો નહીં 
પાછા નયન ના નુર ને વાળી શક્યો નહીં 
હું જેને કાજ અંધ થયો રોઇ રોઇ ને 
તે આવ્યા ત્યારે એને નિહાળી શક્યો નહીં

નયનને બંધ રાખીને મે જયારે તમને જોયા છે
તમે છો એના કરતા પણ વધારે તમને જોયા છે

ઋતુ એકજ હતી પણ રંગ નો'તો આપણો એક જ
મને સહેરા એ જોયો છે બહારે તમને જોયા છે

પરંતુ અર્થ એનો એ નથી કે રાત વીતી ગઇ
નહીં તો મેં ઘણી વેળા સવારે તમને જોયા છે

હકીકતમાં જુઓ તો એય એક સપનું હતું મારુ,
ખુલી આખે મે મારા ઘરના દ્વારે તમને જોયા છે

નહીંતર આવી રીતે તો તરે નહિ લાશ દરિયામાં
મને લાગે છે કે એણે કિનારે તમને જોયા છે

- બરકત વિરાણી ‘બેફામ’

સ્વર :  મનહર ઉધાસ