વંદન કરશે,

વંદન કરશે

હપ્તાખોરો અને જીહુજુરીયાઓ વંદન કરશે

ગ્લેમરસ ગોગલ્સમાં ખાદીધારી વંદન કરશે,

ખમીર વેંચી રહ્યો છે મા ભોમનો આ કપૂત

સ્વીસ બેંકમાં નાણાં મુકનારોય વંદન કરશે,

ભાન ભૂલ્યો છે જે ખૂરશીની ખેંચતાણમાં

ખૂરશીનો એ ખુંદનારો પણ વંદન કરશે,

કરીને બેઠો ચીર હરણ જે ભારત માતાનું

દેશનો દરેક એ દુસાશન પણ વંદન કરશે,

નાત-જાતના વાળા ભૂલી ભરમાવતો સૌને

ખોટો હિન્દુ અને મુસલમાન વંદન કરશે,

કડવા વેણ સચ્ચાઇના બોલીને આ "અશોક"

બસ, સરહદના શહંશાહોને જ વંદન કરશે

             -અશોકસિંહ વાળા