એક એવું ઘર મળે આ વિશ્વમાં,

એક એવું ઘર મળે આ વિશ્વમાં

એક એવું ઘર મળે આ વિશ્વમાં,

જ્યાં કશા કારણ વિના પણ જઈ શકું;

એક એવું આંગણું કે જ્યાં મને;

કોઈપણ કારણ વગર શૈશવ મળે !

એક બસ એક જ મળે એવું નગર;

જ્યાં ગમે ત્યારે અજાણ્યો થઈ શકું;

‘કેમ છો?’ એવુંય ના કહેવું પડે;

સાથ એવો પંથમાં ભવભવ મળે !

એક એવી હોય મહેફિલ જ્યાં મને,

કોઈ બોલાવે નહિ ને જઈ શકું !

એક ટહુકામાં જ આ રૂંવે રૂંવે,

પાનખરના આગમનનો રવ મળે !

તો ય તે ના રંજ કૈં મનમાં રહે -

અહીંથી ઊભો થાઉં ને મૃત્યુ મળે…

                          – માધવ રામાનુજ