આ નભ ઝૂક્યું તે કાનજી

આ નભ ઝૂક્યું તે કાનજી ને ચાંદની તે રાધા રે.

આ સરવર જલ તે કાનજી ને પોયણી તે રાધા રે.

આ બાગ ખીલ્યો તે કાનજી ને લ્હેરી જતી તે રાધા રે,

આ પરવત-શિખર કાનજી ને કેડી ચડે તે રાધા રે.

                               આ નભ ઝૂક્યું તે કાનજી....

આ ચાલ્યાં ચરણ તે કાનજી ને પગલી પડે તે રાધા રે,

આ કેશ ગૂંથ્યા તે કાનજી ને સેંથી પૂરી તે રાધા રે.

                                આ નભ ઝૂક્યું તે કાનજી....

આ દીપ જલે તે કાનજી ને આરતી તે રાધા રે,

આ લોચન મારા કાનજી ને નજરું જુએ તે રાધા રે.

                              આ નભ ઝૂક્યું તે કાનજી...

   કવિ - પ્રિયકાન્ત મણિયાર
સંગીત : અજીત શેઠ
સ્પીચ : હરીશ ભિમાણી
સ્વર : અજીત શેઠ અને નિરુપમા શેઠ
આલ્બમ: મારી આંખે કંકુનાં સૂરજ આથમ્યાં